Ўтаётган 2019 йил иқтисодиётимизнинг барча тармоқларидаги каби ветеринария ва чорвачилик соҳасида ҳам улкан ўзгаришларга, изчил ислоҳотларга бой йил бўлди. Соҳада заҳматкаш ветеринар ва чорвадорлар орзиқиб кутган янгиликлар, туб бурилишлар амалга оширилди.
Хусусан, дастлаб Президентимизнинг 2019 йил 28 мартдаги “Ветеринария ва чорвачилик соҳасида давлат бошқаруви тизимини тубдан такомиллаштириш чора-тадбирлари тўғрисида”ги ПФ-5696-сон Фармони билан Давлат ветеринария қўмитаси Ветеринария ва чорвачиликни ривожлантириш давлат қўмитаси этиб қайта ташкил этилди ҳамда унинг асосий вазифалари белгилаб берилди.
Шунингдек, 2019 йил 28 мартдаги “Ўзбекистон Республикаси Ветеринария ва чорвачиликни ривожлантириш давлат қўмитаси фаолиятини ташкил этиш тўғрисида”ги ПҚ-4254-сон Қарори билан қўмитанинг барча ташкилий тузилмалари тасдиқланиб, фан билан амалиётнинг узвий боғлиқлигини таъминлаш мақсадида қатор институтлар қўмита таркибига ўтказилди ҳамда чорвачилик ва наслчилик ишларини янада ривожлантириш мақсадида “Ўзбекчорванасл” агентлиги ташкил этилди.
Бундан ташқари, соҳага илмий ёндашувни ташкил этиш ҳамда малакали кадрлар тайёрлаш учун Самарқанд ветеринария медицинаси институти ҳамда унинг Тошкент ва Нукус филиаллари, шунингдек Нукус ветеринария техникуми ташкил этилди.
Ушбу тарихий ҳужжатлар билан республикамизда ветеринария ва чорвачилик соҳасидаги ягона давлат сиёсатини юритиш механизми яратилди.
Буларнинг барчаси ўтаётган 2019 йилда давлатимиз раҳбарининг ветеринария ва чорвачилик соҳаларига катта эътибор қаратганлиги билан тарих зарварақларига муҳрланиши шубҳасиз.

Қадрли юртдошлар!

Фурсатдан фойдаланиб, барчангизни, жумладан юртимизда фаолият олиб бораётган барча ветеринар ва чорвадорларни яқинлашиб келаётган “Янги йил” байрами билан самимий қутлайман.

Кириб келаётган 2020 йил ҳам ана шундай файзли ва баракотли келсин!
Сизларга соғлик-саломатлик, бахту-саодат, хонадонингизга тинчлик-хотиржамлик, файзу барака ва ишингизда улкан муваффақиятлар тилайман.

Баҳромжон НОРҚОБИЛОВ,
Ветеринария ва чорвачиликни ривожлантириш давлат қўмитаси раиси.

Маълумки, жорий йилнинг 13 ноябрь куни Ўзбекистон Республикаси Президенти Ш.М.Мирзиёев раҳбарлигида чорвачилик тармоқларини янада ривожлантириш масалаларига бағишланган видеоселектор йиғилиши ўтказилган эди. Унда сохадаги бир қатор муаммоларни бартараф этиш билан биргаликда жойларда тарғибот ва ташвиқот ишларини мунтазам ташкил этиш вазифалари топширилганди. Белгиланган вазифалар ижросини сифатли таъминлаш учун ҳафтанинг ҳар жумаси “Чорвачилик куни” деб эълон қилинди. Бунда, тармоқнинг ҳар бир раҳбари ва ҳоким чорвадорлар билан учрашиб, топшириқлар ижроси доирасида уларнинг муаммосини ҳал қилиб бориш вазифаси белгиланди.
Мазкур вазифалар ижроси доирасида Тошкент вилояти ҳокимлиги ҳамда вилоят ветеринария ва чорвачиликни ривожлантириш бошқармаси ҳамкорлигида Зангиота туманида жойлашган “Melek Best Milk Agro” МЧЖда “Даладан дастурхонгача” мавзусида амалий семинар ўтказилди. Тадбирда Ветеринария ва чорвачиликни ривожлантириш Давлат қўмитаси рахбар ходимлари, вилоят хокимлиги мутасаддилари, худудий “Чорванасл” марказлари ва барча туманлар ветеринария мутахассислари ҳамда чорвадор-фермерлар иштирок этишди.
Семинарда Ветеринария ва чорвачиликни ривожлантириш Давлат қўмитаси раиси Баҳромжон Норқобилов Хукуматимиз томонидан чорвачилик соҳасининг барча тармоқларини ривожлантиришга қаратилаётган эътибор, бу борадаги топшириқларнинг жойлардаги ижроси, айниқса, наслчилик-селекция ишларининг тизимли ташкил этилаётганини алоҳида эътироф этди.

Шунингдек, семинарда сунъий уруғлантиришнинг наслли қорамоллар бош сонини оширишдаги аҳамияти, озуқа базасини мустаҳкамлаш масалаларига эътибор қаратилди. Чорвачиликда наслчилик-селекция ишларини самарали юритиш, қорамолларни озиқлантиришда озуқа рационига эътибор қаратиш, гўшт етиштиришга ихтисослашган бўрдоқичилик хўжаликларини янада кўпайтириш, аҳоли хонадонларида сигирларни сунъий уруғлантириш ишларининг мукаммал тизимини йўлга қўйиш зарурлиги таъкидланди. Чорвачиликда наслчилик ва сунъий уруғлантириш ишларини самарали ташкил этиш мақсадида қўмита раиси томонидан худудий “Чорванасл” марказларига 15 та “Damas” хизмат автомашиналари тантанали равишда топширилди. Семинар давомида Ветеринария ва чорвачиликни ривожлантириш Давлат қўмитаси “Ўзбекчорванасл” агентлиги директори А.Абдуллаев қорамолларни парваришлаш ва сақлашнинг эътиборга молик жиҳатлари хусусида тўхталиб ўтди. Тадбирда чорвачиликка доир барча масалалар атрофлича муҳокама қилинди.
Маълумот ўрнида айтиш жоизки, сунъий уруғлантириш орқали чорва ҳайвонлари маҳсулдорлигини ошириш, чорвачилик маҳсулотлари ишлаб чиқаришни кўпайтириш ва уларнинг таннархини арзонлаштиришга имкон яратилади. Сунъий уруғлантиришни қўллаганда зоти ва маҳсулдорлиги паст буқаларни сақлашда зарурият қолмайди ва бу уларни ўз вақтида ахталаб ва семиртириб сотишга, шу билан бирга ем-хашаклардан унумли фойдаланишга имкон беради. Сунъий уруғлантириш йўли билан олинган бузоқлар табиий усулда қочириш орқали олинган бузоқларга нисбатан тез ўсиши ва касалликларга нисбатан чидамлилиги жиҳатлари бўйича катта афзалликларга эга. Шунинг учун сунъий уруғлантиришни самарали ташкил этишга катта эътибор қаратилмоқда. Деярли барча ферма ва худудий “Чорванасл” марказлари бўлимларида сунъий уруғлантириш шохобчалари ташкил этилган бўлиб, улар наслдор буқаларнинг музлатилган уруғлари, уруғлантириш асбоб ва жиҳозлари билан таъминланган.

Манба; Ветеринария ва чорвачиликни ривожлантириш
        Давлат қўмитаси Ахборот хизмати