• Mobil versiya
  • Bog'lanish
Generic selectors
Exact matches only
Search in title
Search in content
Search in posts
Search in pages

МУСТАҚИЛЛИК БАЙРАМИ АРАФАСИДА ВЕТЕРИНАРИЯ ВА ЧОРВАЧИЛИК СОҲАСИ ВАКИЛЛАРИ ҚЎМИТА ТОМОНИДАН РАҒБАТЛАНТИРИЛДИ

Chop etildi: 30.08.2020

Kategoriyalar: Yangiliklar,Yurtimiz yangiliklari

Мустақиллик байрами арафасида ветеринария ва чорвачилик соҳаси вакиллари қўмита томонидан рағбатлантирилди

Ветеринария ва чорвачиликни ривожлантириш Давлат қўмитаси раҳбарияти соҳада фидойилик билан меҳнат қилаётган ходимларини рағбатлантириб бормоқда.

Бугунги кунда Республикамиз худудларида фаолият юритаётган соҳа ходимларининг ҳар томонлама қўллаб-қувватланаётгани тахсинга сазовор, албатта.

Хусусан, Ўзбекистон Республикаси Мустақиллигининг 29 йиллиги муносабати билан юртимизда айнан шу соҳаларда меҳнат қилаётган бир гурух фидойилар қўмита томонидан тақдирланди.

Қорақалпоғистон Республикаси ҳамда вилоятлар ветеринария ва чорвачилик ривожлантириш бошқармалари, худудий “Чорванасл” марказлари ходимларига қўмита томонидан тақдим этилган велосипедлар топширилди.

Шунингдек, мамлакатимизда эпизоотик барқарорлик ва озиқ-овқат хавфсизлигини таъминлашга муносиб ҳисса қўшиб келаётган кўпгина мутахассислар қўмита томонидан “Фахрий ёрлиқ” билан тақдирландилар.

Ветеринария ва чорвачиликни ривожлантириш
Давлат қўмитаси Ахборот хизмати

ЎЗБЕКИСТОН РЕСПУБЛИКАСИ ПРЕЗИДЕНТИНИНГ ФАРМОНИ

Ўзбекистон Республикаси Президентининг Фармони

Ўзбекистон Республикаси мустақиллигининг йигирма тўққиз йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида

Мамлакатимиз мустақиллигини мустаҳкамлаш, унинг иқтисодий қудратини юксалтириш, барча соҳаларда олиб борилаётган кенг кўламли ислоҳотларни муваффақиятли амалга ошириш борасидаги кўп йиллик самарали меҳнати, халқимиз фаровонлигини оширишга қўшган муносиб ҳиссаси, халқаро стандартларга мос ишлаб чиқариш қувватларини барпо этиш, иқтисодиёт тармоқларини рақамлаштириш, илғор инновацион технологияларни амалиётга жорий қилиш, қулай инвестиция муҳитини яратиш ва экспорт салоҳиятини ошириш, ҳудудлар инфратузилмасини такомиллаштириш, шаҳар ва қишлоқларимиз қиёфасини тубдан ўзгартириш йўлидаги улкан хизматлари, жамиятимизда миллатлараро дўстлик ва тотувликни мустаҳкамлаш, ёш авлодни она Ватанга садоқат, миллий ва умуминсоний қадриятларга ҳурмат руҳида тарбиялаш ишларидаги ибратли фаолияти ҳамда ижтимоий ҳаётдаги фаол иштироки учун қуйидагилар фахрий унвон, орден ва медаллар билан мукофотлансин:

“Ўзбекистон Республикасида хизмат кўрсатган чорвадор” фахрий унвони билан

Жумаев Уткир Тошмурадович – Ғузор туманидаги “Қоракўлчилик илмий наслчилик тажриба станцияси” масъулияти чекланган жамияти директорининг маслаҳатчиси, Қашқадарё вилояти

Тураев Машраб Нархурозович – Нуробод туманидаги “Олға” масъулияти чекланган жамияти бош чўпони, Самарқанд вилояти

“Меҳнат шуҳрати” ордени билан

Жуманиязов Касим Хажиевич – Шовот тумани “Темир йўл обод” чорвачилик ва паррандачиликка ихтисослашган комплекси раҳбари, Хоразм вилояти

Каримов Хуснидин Мўминович – Асака туманидаги “Обод турмуш орзуси” фермер хўжалиги бошлиғи, Андижон вилояти

Салямов Маматкул – Оҳангарон туманидаги “Жасур агро бизнес” фермер хўжалиги бошлиғи, Тошкент вилояти

Файзиева Гулнора Усмоновна – Касби туманидаги “Хўжақулов Бекжон” фермер хўжалиги бошлиғи, Қашқадарё вилояти

“Дўстлик” ордени билан

Вахабов Даврон Абдужалалович – Шаҳрисабз шаҳридаги “Оқ сарой кластер” масъулияти чекланган жамияти таъсисчиси, Қашқадарё вилояти

Жамолдинов Авазбек Акбарович – Улуғнор туманидаги “Андижон бройлер” фермер хўжалиги бошлиғи, Андижон вилояти

Саттаров Уткур Хамидович – Ўзбекистон туманидаги “Соҳибкор Тоғай” фермер хўжалиги бошлиғи, Фарғона вилояти

Собиров Саматжон Набижонович – Чуст туманидаги “Наби Собир” фермер хўжалиги бошлиғи, Наманган вилояти

Яркулова Юлдузхон Газимовна – Кармана туманидаги “Воҳид Мусо” фермер хўжалиги бошлиғи, Навоий вилояти

“Содиқ хизматлари учун” медали билан

Каримов Хамит Исакович – Поп тумани ветеринария ва чорвачиликни ривожлантириш бўлими участка мудири, Наманган вилояти

Маҳатов Муродулло Сулайманович – Бахмал туманидаги “Олис тоғлар” фермер хўжалиги бошлиғи, Жиззах вилояти

Пайғамбаров Абдумуталиб Абдубаннобович – Учкўприк туманидаги “Азизов Акбарали” фермер хўжалиги бошлиғи, Фарғона вилояти

Рахмонов Давлат Амонович – Сардоба туманидаги чорвадор-чўпон, Сирдарё вилояти

Туйчиев Рахатжан Турсинович – Избоскан туманидаги “Избоскан шоналари” фермер хўжалиги бошлиғи, Андижон вилояти

“Шуҳрат” медали билан

Абдуллаев Абдурасул Неъматович – Ўзбекистон Республикаси Ветеринария ва чорвачиликни ривожлантириш давлат қўмитаси раисининг ўринбосари – “Ўзбекчорванасл” агентлиги бош директори

Аккиев Шуҳратжон Жумаевич – Олот туманидаги “Жумагелди” фермер хўжалиги бошлиғи, Бухоро вилояти

Ахмедов Азиз Тошпўлатович – Навбаҳор туманидаги “Қир ариқ” фермер хўжалиги бошлиғи, Навоий вилояти

Курбанов Отабек Хасанович – Янгибозор туманидаги “Хоразм фахри” фермер хўжалиги бошлиғи, Хоразм вилояти

Тоштемиров Олимжон Кушбакович – Зарбдор туманидаги “Ютуқ майдони” фермер хўжалиги бошлиғи, Жиззах вилояти

Уринов Фахридин Очилович – Хатирчи туманидаги “Орзу” фермер хўжалиги бошлиғи, Навоий вилояти

Ўзбекистон Республикаси Президенти Ш.Мирзиёев

ЎЗБЕКИСТОН РЕСПУБЛИКАСИ ПРЕЗИДЕНТИНИНГ ФАРМОНИ

ЎЗБЕКИСТОН РЕСПУБЛИКАСИ ПРЕЗИДЕНТИНИНГ ФАРМОНИ

Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида

Сўнгги йилларда республикада ишбилармонлик ва инвестиция муҳитини тубдан яхшилаш, ортиқча бюрократик тўсиқларни бартараф этиш, эскирган, замон талабларига мос келмайдиган тартиб-таомилларни такомиллаштириш борасида изчил чора-тадбирлар амалга оширилмоқда.
Мазкур йўналишларда олиб борилган ишлар лицензиялаш ва рухсат бериш тизимини либераллаштириш ҳамда институционал ислоҳ қилишнинг янги босқичини бошлаш учун мустаҳкам асос яратди.
Лицензиялаш ва рухсат бериш тартиб-таомилларини тубдан такомиллаштириш ҳамда бюрократик тўсиқларни бартараф этиш орқали тадбиркорлик субъектлари фаолияти учун янада кенг шарт-шароитларни яратиш мақсадида:
1. Адлия вазирлиги, Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Монополияга қарши курашиш қўмитаси ва Савдо-саноат палатасининг қуйидагиларни назарда тутувчи таклифларига розилик берилсин: 

ОЗИҚ-ОВҚАТ МАҲСУЛОТЛАРИ ДОИМИЙ РАВИШДА ЛАБОРАТОРИЯ ТЕКШИРУВЛАРИДАН ЎТКАЗИЛМОҚДА

Chop etildi: 25.08.2020

Kategoriyalar: Yangiliklar,Yurtimiz yangiliklari

Озиқ-овқат маҳсулотлари доимий равишда лаборатория текширувларидан ўтказилмоқда

Бугунги кунда ветеринария соҳаси мутахассислари деҳқон бозорларда озиқ-овқат маҳсулотлари хавфсизлигини таъминлашда жонбозлик кўрсатиб келишмоқда.

Албатта, карантин талаблари асосида ташкил этилаётган тадбирлар давомида Давлат ветеринария хизмати мутахассислари томонидан маҳсулотлар ветеринария кўригидан ўтказилиб, истеъмолга яроқлилик ҳолатлари аниқлангач, савдо расталарига йўналтирилмоқда.

Жумладан, ўтган ҳафтада Тошкент шаҳрининг “Миробод” деҳқон бозорида 1514 кг йирик ва майда шохли мол гўшти маҳсулотлари, 4091 кг парранда гўшти, 40888 дона тухум, 280 кг асал, 27502 кг ўсимлик ва 3380 кг полиз экинлари маҳсулотлари ветеринария кўригидан ўтказилган.

Шу билан бирга 32 дона тухум, 24 кг ўсимлик ҳамда 120 полиз экинлари маҳсулотлари истеъмолга яроқсизлиги аниқланиб, белгиланган тартибда зарарсизлантирилди.

Ветеринария ва чорвачиликни ривожлантириш
Давлат қўмитаси Ахборот хизмати

САМАРҚАНД ВЕТЕРИНАРИЯ МЕДИЦИНАСИ ИНСТИТУТИ ТОШКЕНТ ФИЛИАЛИ ДИРЕКТОРИНИНГ АБИТУРИЕНТЛАРГА МУРОЖААТИ!

Chop etildi: 23.08.2020

Kategoriyalar: Yangiliklar,Yurtimiz yangiliklari

Самарқанд ветеринария медицинаси институти Тошкент филиали директорининг абитуриентларга мурожаати!

                       Ҳурматли абитуриент!

Аввало, Сизга мамлакатимиз олий таълим муассасалари орасидан бизнинг Самарқанд ветеринария медицинаси институтининг Тошкент филиалини танлаганингиз учун ўз миннатдорчилигимни билдираман.

Бизнинг жамоа ўз олдига замонавий билимларни эгаллаб, соҳанинг етук мутахассиси бўлишни ҳамда жонажон Ватанимиз равнақига ҳисса қўшишни ният қилган интилувчан ёшларга ўз мақсадларига етишишида уларни ҳар томонлама қўллаб-қувватлайди ва бор имкониятларини сафарбар этади.

2020-2021 ўқув йилида Самарқанд ветеринария медицинаси институтининг Тошкент филиали кундузги ва сиртқи таълим шакллари бўйича 6 та бакалавриат таълим йўналишларида 425 та талабани қабул қилади.

Давлатимиз раҳбарининг ташаббуси билан ёшларнинг олий таълим олишлари учун яратилаётган шароитлар йилдан-йилга кенгайиб, инсон капиталига давлат томонидан жуда катта инвестиция киритилмокда. Бундай ғамхўрлик натижасида талабаликка қабул қилинган ёшлар сони охирги уч йилда уч баробарга ортди. Жорий йилда абитуриентларнинг хужжатларини рўйхатдан ўтказиш тўлиқ масофадан амалга оширилди. Бизнинг Самарқанд ветеринария медицинаси институти Тошкент филиалига кириш учун 13532 нафар абитуриент хужжатларини рўйхатдан ўтказдилар. Сиз хужжат топширган кундузги бўлим Ветеринария медицинаси (фаолият турлари бўйича) йўналишига 2144 нафар абитуриент талаба бўлиш истагини билдирган.

Бугунги кунда бутун жаҳонда кечаётган пандемия сабабли мамлакатимиз олий таълим муассасаларига кириш имтихонлари муддатлари кечиктирилди. Бу аввало, Сиз ёшларнинг саломатлигингизни ўйлаб, ўз билимингизни намоён қилиш учун қулай ва хавфсиз шарт-шароит яратиш мақсадида амалга оширилди.

Мухтарам Президентимизнинг ташаббуси билан кириш имтихонлари шаҳарлар ва вилоятлардаги марказий стадионларда, яъни очиқ майдонларда карантин талабларига қатьий риоя этган ҳолда 2020 йил сентябрь ойининг 2-санасидан бошлаб ўтказилиши режалаштирилди.

Сиз паспортингиз ва ДТМ рухсатномангиз билан рухсатномада кўрсатилган манзилга белгиланган вақтда етиб келишингиз зарур. Эслатиб ўтамиз, ДТМ рухсатномаларини жорий йилнинг 22 августидан бошлаб ДТМ сайти (www.dtm.uz) даги шахсий кабинетингиз орқали олишингиз мумкин!

Мухтарам абитуриент!

Имтихон куни белгиланган манзилга карантин қоидаларига риоя килиб, хавфсизлигингизни таъминлаб, яхши кайфиятда ва ўз вақтида етиб келиишингизни сўраймиз.

Азиз ота-оналар ва яқинларингиздан имтихон кунлари уйда қолиб, имтихон жараёнларини онлайн кузатиб боришларини сўраб қоламиз.

Кириш имтихонларининг ўтиш муддати, жадвали ва натижалари ҳамда ўзингизни қизиқтирган барча саволларга жавобларни www.svmitf.uz сайти, SVMI Toshkent filiali телеграмм каналидан олишингиз, шунингдек svmi.tfi.yandex.com электрон манзилга ёки 998384119, 971371150, 914537626 рақамли телефонларга мурожаат этишингиз мумкин.

Унутманг, фақат пухта тайёргарлик ва кучли билим билангина талаба бўлиш бахтига муяссар бўлишингиз мумкин. Шундай экан, бир дақиқа ҳам билим олиш ва ўз устингизда ишлашдан тўхтаманг. Сизга ушбу синовлардан муваффақиятли ўтиб олишингизда улкан зафарлар тилаймиз.

Омад ёр бўлсин!

Ҳурмат билан,

Б.Мадатов,

Самарқанд ветеринария медицинаси институти
Тошкент филиали директори

ЖАҲОН БАНКИ ЭКСПЕРТЛАРИ: “ЎЗБЕКИСТОНДА ЧОРВАЧИЛИКНИ РИВОЖЛАНТИРИШ СТРАТЕГИЯСИНИ ТЎЛА ҚЎЛЛАБ-ҚУВВАТЛАЙМИЗ”

Chop etildi: 13.08.2020

Kategoriyalar: Yangiliklar,Yurtimiz yangiliklari

Жаҳон Банки экспертлари: “Ўзбекистонда чорвачиликни ривожлантириш стратегиясини тўла қўллаб-қувватлаймиз”

Ветеринария ва чорвачиликни ривожлантириш давлат қўмитасида “Zoom” платформаси орқали Ўзбекистон Республикасида чорвачилик соҳаси ва унинг тармоқларини ривожлантиришнинг 2020-2030 йилларга мўлжалланган стратегияси муҳокамаларига бағишланган видеоконференция бўлиб ўтди.

Унда қўмита раиси Баҳром Норқобилов, “Ўзбекчорванасл” агентлиги бош директори Абдурасул Абдуллаев, Жаҳон Банки экспертлари, Агросаноат мажмуи ва озиқ-овқат таъминоти соҳасидаги лойиҳаларни амалга ошириш агентлиги, билан биргаликда қўмита ва “Ўзбекчорванасл” агентлиги масъул ходимлари ҳамда худудий мутахассислар иштирок этишди.

Музокаралар аввалида қўмита раиси Баҳром Норқобилов бугунги кунда мамлакатимизда чорвачилик соҳасида олиб борилаётган туб ислоҳотлар ва эришилаётган натижалар хусусида сўз юритди. Онлайн мулоқот чоғида Ўзбекистонда чорвачилик тармоқларини ривожлантиришни янги босқичга олиб чиқишда жаҳон тажрибаларини тадбиқ этиш, минтақада чорвачилик комплексларини кўпайтириш, маҳсулдорликни ошириш ҳамда чорва озуқа базасини мустаҳкамлаш каби масалалар муҳокама қилинди.

Мулоқот давомида Жанубий Кореянинг “KOPIA” маркази билан ҳамкорликдаги лойиҳалар ҳамда худудларда чорвачиликни ривожлантириш бўйича олиб борилаётган чора-тадбирларга хусусида ҳам фикр юритилди.

Жаҳон Банки экперти Теклу Тасфей фикрича, бу соҳани янада ривожлантириш минтақа учун зарур аҳамиятга эга. Шу орқали маҳсулдорликни ошириш ва мамлакатни чорвачилик маҳсулотлари билан барқарор таъминлашга эришиш мумкин. Яна бир жиҳат – чорвачилик хўжаликлари фаолиятини ривожлантиришга ҳам катта эътибор қаратиш лозим.

Мулоқотда миллий конгсултант Умид Назарқуловнинг соҳага доир тақдимоти ҳам намойиш этилди. Жаҳон Банкининг яна бир эксперти Соломон Деста мазкур стратегия тақдимоти бўйича сўз юритаркан, уни тўлақонли қўллаб-қувватлашини билдириб, унда соҳа истиқболи учун амалга оширилиши лозим бўлган қатор масалалар кўрсатиб ўтилганлигига урғу берди.

Шунингдек, мамлакатимизда тармоқни ривожлантириш бўйича олиб борилаётган ислоҳотларни юксак баҳолади. – “Соҳани жаҳон стандартлари даражасига олиб чиқишда юқори маҳсулдорликка эътибор қаратиш, бунинг учун мавжуд озуқа экин майдонларидан унумли фойдаланиш, натижада аҳолини чорва маҳсулотларига бўлган эҳтиёжини тўла қондиришга эришиш мумкин”, – дея такидлади халқаро эксперт.

– “Соҳада ишлаб чиқариш ресурсларини мувофиқлаштириш, давлат ветеринария хизматини ривожлантириш ва чорва озуқа маҳсулотлари ишлаб чиқариш хажмини ошириш олдинда турган энг долзарб масалалардан”, – дея изоҳлади Соломон Деста.

Айниқса, илмий-инновацион ёндашувларга асосланиш, соҳада илмий тадқиқотлар олиб бориш, замонавий технологиялар ва илғор ҳорижий тажрибаларни кенг жорий этиш ҳамда етук кадрларни тайёрлаш баробарида фан ва амалиётнинг узвий боғлиқлигини таъминлаш соҳанинг муҳим бўғини эканлигини алоҳида эътироф этди.

Мулоқот давомида озуқа ишлаб чиқариш хажмларини ошириш, уруғчиликни ривожлантириш масалаларига ҳам тўхталиб ўтилди.

Мулоқотда халқаро эксперт бугунги глобаллашув жараёнида замонавий технологиялардан фойдаланиш – соҳа истиқболидаги ягона таянч нуқтаси эканлигига эътибор қаратди.

Унинг қайд этишича, ҳайвонлар касалликларининг олдини олиш тадбирлари баробарида наслчилик-селекция ишларини жадал ривожлантириш мазкур тармоқ ривожига катта туртки беради. Чунки чорва наслининг яхшиланиши юқори маҳсулдорликка эришишни кафолатлайди. Бу эса маҳсулот ҳажми ортишига замин яратади.

Шу билан бирга ҳайвонларни электрон назорат қилиш ва бу борада рақамли технологиялардан унумли фойдаланиш бугун кўпгина мамлакатларда қўлланилмоқда. Агар Ўзбекистонда ҳам ушбу тизим тўлиқ жорий этилса, соҳа ривожи учун янги имкониятлар эшиги очилади. Яъни бу борада тўлиқ электрон назорат ўрнатилади.

Шунингдек, чорва маҳсулотларини ишлаб чиқариш ва қайта ишлаш корхоналари фаолияти ҳам бирмунча кенгаяди.

Мулоқот давомида чорвачилик тармоқлари учун озуқа экин майдонларидан самарали фойдаланиш, озуқа рационини тўғри тақсимлаш, парвариш жараёнида жонзотларни сақлаш жойлари ва муҳитига эътибор қаратиш лозимлиги таъкидланди.

Видеоконференция сўнггида жаҳон Банки экспертлари томонидан соҳани янада ривожлантиришга оид таклифлари тингландди ҳамда келгусидаги ҳамкорлик жараёнлари бўйича келишиб олинди.

 

 

Ветеринария ва чорвачиликни ривожлантириш
Давлат қўмитаси Ахборот хизмати

“ЎЗБЕКИСТОН 24” РАДИОКАНАЛИ ТАҚДИМ ЭТАДИ: ҚУЁНЧИЛИКДА НАСЛЧИЛИК-СЕЛЕКЦИЯ ИШЛАРИ, ҚУЁН КАСАЛЛИКЛАРИНИНГ ОЛДИНИ ОЛИШ ВА УНИ ПАРВАРИШЛАШ УСУЛЛАРИ

Chop etildi: 04.08.2020

Kategoriyalar: Yangiliklar,Yurtimiz yangiliklari

“Ўзбекистон 24” радиоканали тақдим этади: Қуёнчиликда наслчилик-селекция ишлари, қуён касалликларининг олдини олиш ва уни парваришлаш усуллари

Қуёнчилик тармоғида наслчилик-селекция ишлари, қуёнларда учрайдиган турли касалликлар, уни парвариш қилиш ва кўпайтиришда айнан қайси жиҳатларга эътибор қаратиш лозим?

“Ўзбекистон 24” радиоканали “Агроолам” дастурининг навбатдаги сонида мазкур саволларга ойдинлик киритилди.

Радиоинтервьюда Ветеринария ва чорвачиликни ривожлантириш давлат қўмитаси ҳузуридаги Наслли қуён етиштирувчилар ассоциацияси раиси Элмурод Ортиқов телефон орқали ўзининг мавзуга доир мулоҳазалари билан ўртоқлашди.

Элмурод Ортиқов, шунингдек мулоқот давомида янги туғилган қуён болаларини парваришлашда чалиниши мумкин бўлган табиий касалликларга қарши эмлаш ва даволаш тадбирларини олиб бориш бўйича муҳим жараёнлар хусусида ҳам фикрларини баён этди.

Ветеринария ва чорвачиликни ривожлантириш
Давлат қўмитаси Ахборот хизмати

ЎЗБЕКИСТОН РЕСПУБЛИКАСИ ВЕТЕРИНАРИЯ ВА ЧОРВАЧИЛИКНИ РИВОЖЛАНТИРИШ ДАВЛАТ ҚЎМИТАСИ РАИСИНИНГ ҚУРБОН ҲАЙИТИ АЙЁМИ МУНОСАБАТИ БИЛАН БАЙРАМ ТАБРИГИ!

Chop etildi: 31.07.2020

Kategoriyalar: tanlangan sahifa,Yangiliklar,Yurtimiz yangiliklari

Ўзбекистон Республикаси Ветеринария ва чорвачиликни ривожлантириш давлат қўмитаси Раисининг Қурбон ҳайити айёми муносабати билан байрам табриги!                Азиз юртдошлар!

Юртимизнинг маънавий ҳаётида беқиёс ўрин эгаллаган, жамиятимизда ўзаро ҳурмат, меҳр-оқибат ва бағрикенглик тамойилларини ўзида мужассам этган муборак Қурбон ҳайити байрами барчамизга муборак бўлсин!

Бугун жонажон халқимиз катта интиқлик билан кутиб олаётган ушбу қутлуғ айём билан сиз азизларни, барча ватандошларимизни чин қалбимдан самимий табриклайман.

Шундай муқаддас кунларда сизларга, бутун эл-юртимизга сиҳат-саломатлик, тинчлик-омонлик, бахту саодат тилайман.

Дунё давлатллари қатори юртимизни ҳам четлаб ўтмаган оғир синов – коронавирус пандемияси шароитида биз Қурбон ҳайитининг жамиятимиз ҳаётидаги беқиёс ўрни ва улкан аҳамиятини янада чуқур ҳис этмоқдамиз. Мана шундай мураккаб вазиятда бу муқаддас қадриятларимиз юртдошларимизга янада куч-ғайрат ва сабр-бардош бағишламоқда.

Ер юзига Аллоҳнинг раҳмати ёғилиб турган ушбу саодатли кунларда барча пок ниятларимиз ижобат бўлишини, юртимизни турли бало-қазолардан асрашини, бирдамлик, дўстлик ва аҳиллик туйғуларимиз янада зиёда бўлишини Яратгандан сўраб қоламан.

Эзгу интилишларимизда Аллоҳ таоло ҳамиша мададкор бўлсин!

Қадрли ватандошлар!

Фурсатдан фойдаланиб, барча ватандошларимизни, жумладан юртимизда фаолият олиб бораётган барча ветеринар ва чорвадорларни муборак Қурбон ҳайити айёми билан самимий қутлайман!

Хонадонларимизда тинчлик-осойишталик, файзу барака бардавом бўлсин! Сизларга соғлик-саломатлик, бахту-саодат, хонадонингизга қут-барака ва ишингизда муваффақиятлар тилайман!

Муборак Қурбон ҳайитининг қадами қутлуғ келиб, элимизни барча синовлардан фориғ этсин!

Баҳром НОРҚОБИЛОВ,

Ветеринария ва чорвачиликни ривожлантириш
давлат қўмитаси раиси

НАСЛЛИ ҚОРАМОЛ БОҚИШ – ГЎШТ ВА СУТ МАҲСУЛДОРЛИГИ ОШИШИГА ХИЗМАТ ҚИЛАДИ

Chop etildi: 30.07.2020

Kategoriyalar: Yangiliklar,Yurtimiz yangiliklari

Наслли қорамол боқиш – гўшт ва сут маҳсулдорлиги ошишига хизмат қилади

Юртимизда эпидемиологик вазият давом этаётган бўлса-да, ветеринария мутахассислари томонидан худудларда аҳоли қорамолларини белгиланган режа асосида сунъий уруғлантириш тадбирлари давом эттирилмоқда.

Хусусан, Самарқанд вилоятининг Пайариқ туманида давлат ветеринария хизмати ходимлари карантин қоидаларига қатъий амал қилган ҳолда аҳоли қарамоғидаги чорва ҳайвонларини сунъий уруғлантириш ва наслчилик-селекция ишларини самарали ташкил этишда жонбозлик кўрсатиб келиишмоқда.

Ҳозирда худудга наслли буқа уруғлари етказиб берилиб, туман ветеринария ва чорвачиликни ривожлантириш бўлимига қарашли 33 та сунъий уруғлантириш пунктлари мутахассислари томонидан шу кунга қадар тумандаги 9 минг 51 бош сигир ва ғунажинлар сунъий уруғлантирилди.

Ветеринария ва чорвачиликни ривожлантириш
Давлат қўмитаси Ахборот хизмати

“КОРРУПЦИЯ ВА ПОРАХЎРЛИККА ҚАРШИ БИРГАЛИКДА КУРАШАМИЗ”

Chop etildi: 29.07.2020

Kategoriyalar: Yangiliklar,Yurtimiz yangiliklari

“Коррупция ва порахўрликка қарши биргаликда курашамиз”

Маълумки, Ўзбекистон Республикаси Президентининг 2017 йил 2 февралдаги “Коррупцияга қарши курашиш тўғрисида”ги Ўзбекистон Республикаси Қонунининг қоидаларини амалга ошириш чора-тадбирлари тўғрисида”ги 2752-сонли Қарори қабул қилинган эди.

Мазкур қарорда белгиланган муҳим вазифалар ижросини таъминлаш мақсадида худудларда тарғибот ва ташвиқот ишлари олиб борилмоқда.

Хусусан, қўмитанинг Самарқанд ветеринария медицинаси институти ҳамда унинг Нукус филиалида “Коррупция ва порахўрликка қарши биргаликда курашамиз” мавзусида онлайн семинар ташкил этилди.

Самарқанд вилоят прокуратураси, ИИБ ва вилоят Адлия бошқармаси ходимлари билан ҳамкорликда ўтказилган семинарда институт проректори А.Гаппаров, институтнинг Нукус филиали директори А.Есимбетов ҳамда профессор-ўқитувчилар иштирок этишди.

Видеомулоқотда соҳа мутахассислари томонидан бугунги куннинг долзарб масалаларидан ҳисобланган коррупцияга қарши кураш бўйича жойларда олиб борилаётган амалий ишлар, айниқса таълим тизимида бу жирканч иллатнинг олдини олишга қаратилган муҳим чоралар хусусида фикрлар билдирилди.

Шунингдек, онлайн семинар давомида аҳолининг ҳуқуқий онги ва ҳуқуқий маданиятини ошириш бугунги замон талабига айланган муҳим омиллардан эканини қайд этиб ўтилди.

Шу билан бирга соҳа мутахассислари тизимда ҳар бир ходим виждонан фаолият олиб бориши, иш жараёнида коррупция ҳолатларига йўл қўймаслик лозимлигига урғу бераркан, жамиятда коррупцияга нисбатан муросасиз муносабатни шакллантириш ва бу иллатга қарши мардонавор курашиш кераклигини алоҳида таъкидлади.

Самарқанд ветеринария медицинаси институти
Нукус филиали Ахборот хизмати